Pagguiromdom sa Nakaaging Traslacion

Bulan na baga nin Septiembre asin aram ta na mga Nagueño na bulan ini kan kapistahan, bulan kan Voyadores, bulan ni Nuestra Señora de Peñafrancia, an patrona kan Bicol.

Sarong semana na sana asin isicelebrar na ulit an Traslacion na pinagdadayo asin pinaghahalat na celebrasyon kan mga bicolano asin kan mga catolico. Dawa na ngani bakong bicolano, maski mga taga ibang lugar asin probinsiya, minadayo sana para makaiba sa dakulang celebrasyon na ini. Yaon na naman digdi an pahingurag na tawo asin an mga manlaen-laen na kolor na bado kan mga Voyadores.

Natandaan ko kan nakaaging taon, pinagcelebrar an ika 300 na taon kan Nueva Caceres. Gulpeng mga bisita hale sa manlaen-laen na lugar an nagdarayo, mga kapadian na igwa pa ngani hali sa Roma an nagatindir digdi. Natatandaan ko man na gulpehon tawo an nagiriba sa traslacion asin pagkagulpe kan mga Voyadores an naghatod ki Ina.

Kan nakaaging taon, dai ako nagvoya nin hule ta dara ko an sakong camera asin pinili ko na ritratohon asin kuanan an mga tawong nagraralakaw lalo na an mga Voyadores por dahil digdi, magayon balik-balikan an mga nakua kong ritrato.

Ngonian na taon, sa sunod na semana, Traslacion na naman asin aram ko na dai ako mavoya. Naguugma an sakong puso ta an Traslacion an saro sa pinaghahalat-halat kong okasyon taon-taon puon pa kan aki ako. Maugmang mahiling an mga nakabiritis na nagsusurosuan, an iba nagtuturuludan, an iba nasasakitan maghangos pero dawa na ngani, yaon pa sinda sa kasiribotan na ito, nakikisuksokan, nakikitulodan, nagtatyaga asin nagsasakripesyo para ipamate asin ipahiling ki Ina an saindang devosyon.

Pero dawa na ngani dai ako mavoya, gamit ko man an sakong camera para ritratohon asin ipreservar an celebrasyon na ini. Sa paagi kan mga ritrato na sakong makukua, bako lang sadiri kong pagmate an maiwawaras ko, sa paagi kan mga ritrato, mahihiling kan iba asin kutana mamate man ninda an pagdumamay sa celbrasyon na ini.

Maghirilingan kita sa Traslacion 2011. Viva la Virgen!