An mga Voyadores sa Traslacion Dos Mil Onse: Pagcelebrar kan ika-301 devosyon ki Ina

Nagpuon an aldaw na mainit an panahon, pagmate ko garo bulan nin April o Mayo ta abang init kan aldaw. Maliwanag ang panganoron asin nasa isip ko ko, kaipuhan ko kani magkaag nin sunblock ta baka matutong ako kan sirang kan aldaw.

Gulpe na an nagraralakawan sa tinampo nin hule ta may kabagalan naman an dalagan kan mga awto. Maririsa na gulpeng mga devoto an nagaarabotan, an iba nakasarakay pa sa bus.

magsaysay avenue

Tigbareta sa telebisyon na alas dies pa lang nin aga isasara na an mga mayor na tinampo sa laog kan ciudad lalo na ang kalabaan kan Peñafrancia Avenue saka an E. Angeles Street puon sa may Cathedral hasta duman sa may Quence Martires.

Magayon ang panahon, an sabi ko sa sadiri ko, pero makaherak ang mga devoto lalo na an mga Voyador kun arog kaini kainit ang aldaw. Saro man akong Voyador kaya aram ko kun ano an pagmate na maglakaw nakabitis, nakikisusuan lalo na sa katahawan kan kadakol na mga lalakeng nagaaragawan makadulok sa andas ni Ina para lamang makakapot. An arog kaning aldaw, makulog sa bitis an init kan tinampo, maharasahas lalo na kun sa kagolpehan kan kataid mo, maski ang bitis mo, dai mo na mahihiling. Dai pa jan kabali an manlaen-laen na parong na dara kan mga ginagaranot na Voyador. Pero ang magayon sa arog kaining panahon, dai nagtatagal sa tahaw kan tinampo ang Voyador, ta masakit ang init kan tinampo saka ang init sa laog kan mga nagvovoya. Pero sa sakong eksperyensya, mas madali makalaog sa Andas ni Ina kun abang init kan panahon.

Mga ala una nin hapon kan ako naglakaw na sa kalabaan kan Peñafrancia. Napoon na palan an prosesyon. An mga estudyante asin an mga miembro kan religious asin civic organization nagraralakawan na. Gulpe man akong midbid na nagkasarabatan. Gulpe an naghaharalat sa gilid kan tinampo, sa pagagi ni Ina.

voyadores

Pero haloy pa man ta alas dos nin hapon pupunan ang misa sa luwas kan lumang simbahan kan Peñafrancia kun sain inot na nagistar an namomotan na Ina.

Mga pasado alas dos kan nagbago an panahon, nagdiklom an panganoron asin naglipot an duros. Si mga nagpoprosesyon na may mga payong, bako ng init kan saldang an saindang papandungan, kundi an dai mabasa sa paluway-luway na pagbagsak an uran.


Nagpresko ang panahon asin siguradong naogma an mga Voyador sa paglipot kan mga tinampo. Pero bako ang mga nasa media o si mga may darang camera asin mga gadget na gagamiton ninda sa pag-cover kan okasyon na ini. Marhay ta dara ko an sakong plastic camera cover, diretso an sakong paglakaw-lakaw.

Divino Rostro
Nuestra Señora de Peñafrancia
Nuestra Señora de Peñafrancia





Gulpe man guiraray an tawo sa okasyon na ini, pagmate ko, padakul nin padakul an mga devoto asin mga nagaaratindir sa okasyon kan Nueva Caceres, ang Traslacion ni Ina, an pagdara asin paglipat hali sa simbahan kan Peñafrancia pasiring sa Naga Cathedral.

Halos alas sies na nin pagkahapon kan nagpuon ang misa sa Cathedral. Maugma an selebrasyon, matrayumpo asin organisadong marhay an prosesyon.

naga cathedral


Sa arog kung devoto, magayon asin magian sa pagmate dalanon si Ina dara kan mga Voyadores, nagkukuraw na, Viva la Virgen! Viva el Divino Rostro!

Viva la Virgen!

sa flicker: Traslacion 2011 sa Flicker ko

About these ads